本來一早定左，今個星期日冰窖熊要帶組查經，不過冰窖熊無記性，上個星期口快快，應承左一家教會去講道，結果等到琴日先至無意之間發現撞時間。於是，小組被迫臨時改期，真係對唔住各位組員，好唔好意思！鎖你 (Sorry)！鎖你 (Sorry)！

點知因禍得福，攪唔成查經都要做番 D 野嘛！冰窖熊靈機一觸，不如成班老豆齊齊放假，去睇 BATMAN 同 JOKER 啦！反正 D 老婆唔會有興趣，D 仔又未夠十三歲唔睇得！不如成班老豆一齊放晚假，行開輕鬆吓啦！

蝙蝠俠同超人都係冰窖熊既童年至愛，冰窖熊份人忠奸分明，特別鍾意超人同蝙蝠俠兩個人物，而兩個之中，冰窖熊最鐘意就係蝙蝠俠。超人係「正義」既朋友，佢既「正義」非常超現實。超人係外星人，無人性既墮落，再加上能力超強，秉行公義都可以唔使付出代價，對於嚮地球土生土長既冰窖熊，「超人」似乎遙遠左小小。

蝙蝠俠就好唔同，佢無超能力，係凡人一個，捉賊破案其實用腦多過用力，佢最大既 Power 就係錢，佢一身古靈精怪既架生，就最吸引冰窖熊。蝙蝠俠為民請命既俠義精神，好似人性醜陋既黑暗世界裡面既一點暗淡燈光。蝙蝠俠巧妙咁將民間草莽英雄既俠義精神，西方中古時代既騎士精神，同基督教修道院既隱士精神，三合一而成為一個現代既都會英雄，比我地一班嚮「英雄已死」既二十世紀長大既細路，略略感受一吓俠義精神，同背後要付出既代價，為左伸張正義而不惜犧牲自己，就有如古語有曰：「明知不可為而為之」，好多謝蝙蝠俠為我地作出現代既演繹。

雖然話今日係法治既時代，蝦蝦霸霸既惡人依然好多好多，受害人比人蝦到死蝦到病都無人夠膽出聲，出聲果個反宜會比人鬧，話佢多事。其實，今日既社會依然好需要有富俠義精神既人去秉行正義，將果ｄ本來隱藏既惡行暴露出黎！而蝙蝠俠既死對頭 Joker 可以話係一個非常極端既人板，原著漫畫裡面既 Joker真係好抵死，佢一方面作惡多端，另一方面佢又好識扮 Victim ，話自己係受害者，So Ironic! 今次 Joker 出場，冰窖熊點可以唔捧場呢？

今次希望可以睇到 IMAX 版啦！身為正宗香港(島)人，梗係要嚮 IMAX 既超大銀幕到搵吓，睇吓見唔見到以前冰窖熊住果間既大廈啦！黑騎士蝙蝠俠，冰窖熊黎啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝

可能有人會問：「成班人去睇蝙蝠俠有無屬靈意義呀？」

為免比人嘈，冰窖熊提出以下幾個討論既屬靈問題，供大家睇完戲之後，食飯既時候一齊討論。

問題一：我地都係人，都有自己既醜陋，又憑甚麼批評人論斷人呢？「秉行公義」是不是「論斷」呢？

問題二：耶穌當年也沒有用石頭來打死那個捉奸在床既淫婦，我地今天面對人的惡行時，究竟應該如何處理呢？是對抗？還是包容？

問題三：耶穌曾說：要「以善勝惡」而非「以惡報惡」，可是，在「秉行公義」既過程中，難免會動粗甚至傷及人命，那豈不是「以暴易暴」嗎？這樣的反應是否也是犯罪呢？究竟我們應該怎樣面對呢？這是否代表我們要放棄「秉行公義」呢？

唔好睇少以上三條問題，佢地考起左好多人嫁啦！即使信得耐既人都未必識答，即使答對亦未必有勇氣實行出黎，唔簡單嫁！